Endametiya KOMKAR a Swîsreyê di Parlamentoya Penaberan de Hate Pejirandin

Baran Dicle

KOMKAR a Swîsreyê, ku bi salan e li Swîsreyê dengê koçber û penaberan e, careke din serkeftineke girîng bi dest xist. Di encama têkiliyên ku bi Parlamentoya Penaberan a Swîsreyê (Flüchtlingsparlament Schweiz) û Foruma Penaberan a Swîsreyê (Flüchtlingsforum Schweiz) re hatin meşandin de, endametiya KOMKAR a Swîsreyê hate pejirandin.

Pejirandina endametiya KOMKARê ne tenê wekî pejirandina endametiya saziyekê tê dîtin, lê her weha wekî nîşaneya rêzgirtin û xuya bûna civaka Kurd a li Swîsreyê di nav têkoşîna demokratîk de tê nirxandin.

KOMKAR, ku bi salan e ji bo beşdarbûna koçberan di jiyana civakî de, parastina mafên penaberan û pêşxistina hevgirtina nav çandan dixebite, bi taybetî di vegihandina pirsgirêkên koçberên Kurd bo raya giştî de roleke girîng lîstiye. Bi saya xebatên civakî, çandî û siyasî ku li kantonên cihêreng ên Swîsreyê hatine meşandin, ev sazî bûye yek ji nûnerên rêzdar û bawermend ên civaka koçberan.

Di nameya ku ji aliyê berpirsiyarên Parlamentoya Penaberan ve hat şandin de hate diyarkirin ku beşdarbûna çalak a KOMKARê di xebatên ji bo baştirkirina şert û mercên jiyana penaberên li Swîsreyê de bi dilxweşî hatiye pêşwazîkirin. Di heman demê de hate ragihandin ku di dema pêş de dê li Bernê rûniştinên Parlamentoya Penaberan bêne lidarxistin û di gelek platforman de xebatên hevbeş bêne pêşxistin.

Hebûna KOMKARê di vê platformê de careke din nîşan dide ku civaka Kurd ne tenê ji bo mafên xwe yên neteweyî û demokratîk têkoşîn dike, lê her weha wekî aktoreke demokratîk a ku ji pirsgirêkên hemû koçber û penaberên li Swîsreyê re hestyar e û ji bo çareserkirinê dixebite, roleke girîng dilîze.

Bi taybetî di van salên dawî de ku li Ewropayê siyaseta koçberî û penaberiyê bi awayekî berfireh tê nîqaşkirin, nûnertiya saziyên Kurd di van mekanîzmayên neteweyî de girîngiyeke taybet heye. Bi vê endametiyê re, ezmûn, daxwaz û pêşniyarên civaka Kurd dê di platformên berfirehtir de bêne bilindkirin û dê alîkariyek rasterast ji bo çareserkirina pirsgirêkên koçber û penaberan were pêşkêşkirin.

Ev serkeftina KOMKARê ne tenê serkeftineke sazî ye; ew di heman demê de encama xebat, têkoşîn û berpirsiyariya civakî ya Kurdên ku bi salan e di nav têkoşîna demokratîk de cih digirin e.

Tê payîn ku xebatên ku KOMKAR a Swîsreyê di nav Parlamentoya Penaberan û Foruma Penaberan de dê bimeşîne, hem ji bo têkoşîna mafên koçberan û hem jî ji bo xurtkirina nûnertiya demokratîk a civaka Kurd beşdariyeke girîng pêşkêş bikin.

Pejirandina endametiya KOMKARê ji bo Kurdên ku li Swîsreyê dijîn ne tenê pêşketineke sembolîk e; ew di heman demê de gaveke girîng e ji bo xurtkirina beşdariya demokratîk, hevgirtina civakî û nûnertiya siyasî.